അവന്‍ പറയാത്തത്

മുറിച്ചാല്‍ തൂക്കത്തില്‍
മുള്ളും ചെകളേം ചേതം
മുഴുത്തതു മുഴുവനോടാരു
വാങ്ങാന്‍? മുറിച്ചു.

ഉടുക്കാത്ത കുഞ്ഞിന്റെയുണ്മ പോലെ
അപ്പോള്‍ പെറ്റേന്റെ മറൂള പോലെ
അറുത്ത മീന്‍പള്ളേല്‍ അച്ചുമോതിരം

മൂളിപ്പറന്നോട്ടെയീച്ച

അപ്പൂനുടുപ്പാതിരേടെ ഫീസ്
ശാന്തേടെ കഷായക്കുറിപ്പ്
ആരാന്റെ ശാപം തുണ

ഓരോ തുണ്ടം കള്ളി-
പ്പൂച്ചകള്‍ക്കും പേരുചൊല്ലി
എറിഞ്ഞു കൈകഴുകാം
‘എല്‍സേ സുനിതേ പുഷ്പവല്ലീ’

ആയഞ്ചേരി ഷാപ്പിലന്തിമോന്താന്‍
തൊടുകറിയായ്ത്തന്ന മീന്തല
പറഞ്ഞതാണിതെന്നോടിത്
അവന്‍ പറയാതെ ബാക്കി വെച്ചവ

തലക്കറിക്കെരിവേറുമ്പോള്‍
ഒന്നു തപ്പിയേര്
സ്വന്തം വിരലിലും

മന്തിരച്ചാറ്റില്‍ വന്നു തന്തമാര്‍
ഉണ്ണിയെ നല്‍കി മറവതും
നടയില്‍ മെതിയടിക്കുറി വെച്ച്
അഞ്ചാള്‍ക്കറ പകുത്തോളെ
പൂത്തചേലാടയുരിഞ്ഞതും
കരുപ്പക കളം താണ്ടി
കുരുക്ഷേത്രമായതും
പെരിയോനെ വീഴ്ത്താന്‍
പെണ്ണാണന്‍ മറയായതും
മുടിചുകന്നേ കുടിമുടിഞ്ഞതും
എഴുതിയോന്‍, കുലം വാഴാന്‍
ഉടപ്പിറന്നോന്റെ പെണ്ണില്‍
കുലച്ചവന്‍ ആദിമുക്കുവന്‍
വേറിട്ടവനില്‍ നിന്ന്
വേറെന്തുണ്ടു കുറിക്കുവാന്‍?
മീനായിത്തന്നെ മീളണ്ടേ
കടലാണ്ട നേര്‍നാന്മറ.